भांबवडे जिल्हा परिषद शाळेत सुरक्षा बळकट; भोर तालुका पत्रकार संघाचे उपाध्यक्ष पत्रकार जीवन सोनवणे यांची सीसीटीव्ही कॅमेऱ्यांची भेट
मंगेश पवार
सारोळे : तालुक्यातील भांबवडे गावातील जिल्हा परिषद प्राथमिक शाळेला सुरक्षेच्या दृष्टीने महत्त्वपूर्ण बळ मिळाले आहे. भोर तालुका पत्रकार संघाचे उपाध्यक्ष आणि गावचेच सुपुत्र जीवन सोनवणे यांनी सामाजिक बांधिलकी जपत शाळेला दोन आधुनिक सीसीटीव्ही कॅमेऱ्यांची भेट दिली. ग्रामीण भागातील शाळांमध्ये सुरक्षितता, शिस्तबद्धता व विद्यार्थ्यांच्या संरक्षणासाठी अशा सुविधा आवश्यक ठरत असताना हा उपक्रम गावाशी असलेली भावनिक नाळ अधिक दृढ करणारा ठरला आहे.
शाळेच्या परिसरात आणि इमारतीत बसविण्यात आलेले हे कॅमेरे विद्यार्थ्यांच्या हालचालींवर तसेच शाळेच्या एकूण शिस्तीवर सातत्याने लक्ष ठेवण्यास मदत करणार आहेत. शिक्षक, पालक आणि ग्रामस्थांनी या सामाजिक उपक्रमाचे स्वागत करत जीवन सोनवणे यांचे मनापासून आभार व्यक्त केले.
याप्रसंगी जीवन सोनवणे यांनी सांगितले की, “माझं गाव, माझा अभिमान” या संकल्पनेतून आगामी काळात संपूर्ण गावामध्ये सीसीटीव्ही कॅमेरे आणि पब्लिक अॅड्रेस स्पीकर सिस्टम बसवण्याचा संकल्प केला आहे. सुरक्षित, सतर्क आणि सुसंस्कृत गाव घडवण्यासाठी हा छोटासा प्रयत्न आहे.”
कार्यक्रमाला सरपंच माधवीताई सोनवणे, शाळा व्यवस्थापन समितीचे अध्यक्ष संतोष सोनवणे, उपाध्यक्षा आशा पवार, शिक्षिका निवेदिता फडणवीस, ग्रामसेवक महादेव सोनवणे आदी उपस्थित होते. शाळेच्या उभारणीत समाजातील व्यक्तींनी पुढाकार घेणे ही गावासाठी सकारात्मक बाब असल्याचे मान्यवरांनी व्यक्त केले.
भांबवडे गावात यापूर्वीही विविध सामाजिक उपक्रम जीवन सोनवणे यांच्या माध्यमातून राबवले गेले आहेत. ग्रामीण भागातील शैक्षणिक गुणवत्ता उंचावण्यासाठी आणि मुलांच्या सुरक्षिततेसाठी अशा प्रयत्नांची गरज असल्याचे स्थानिकांनी नमूद केले. तरुण नेतृत्व पुढे येत असल्याने ग्रामस्थांमध्ये समाधान व्यक्त होत आहे.
या उपक्रमामुळे भांबवडे शाळेच्या सुरक्षिततेची पातळी उंचावली असून, येत्या काळात राबविण्यात येणाऱ्या ग्राम सीसीटीव्ही व स्पीकर प्रकल्पामुळे भांबवडे गाव ‘सुरक्षित व प्रगत गाव’ होण्याच्या दिशेने आणखी एक महत्त्वाचे पाऊल टाकणार आहे.
