हातवे बुदुक (ता.भोर)येथे घरगुती सिलिंडर स्फोट; बाधित कुटुंबाला सामाजिक मदतीचा हात
मंगेश पवार
नसरापूर:- परिसरातील हातवे बुदुक (ता. भोर) येथे काल सायंकाळी घरगुती गॅस सिलिंडरचा स्फोट होऊन सुनिता नंदकुमार गुरव यांच्या घराचे मोठे नुकसान झाले. सुदैवाने जीवितहानी टळली असली तरी घरातील साहित्याचे मोठ्या प्रमाणावर नुकसान झाले आहे.
या घटनेनंतर श्री स्वामी समर्थ सेवेकरी व्हाटसअप ग्रुप वतीने बाधित कुटुंबाला मदतीचा हात देण्यात आला. गुरव (आजी) यांना किराणा मालाची मदत जिल्हा परिषद शाळा हातवे येथील विद्यार्थ्यांच्या हस्ते देण्यात आली. या उपक्रमातून विद्यार्थ्यांमध्ये सामाजिक जाणीव, सेवाभाव व संवेदनशीलता रुजवण्याचा प्रयत्न करण्यात आला.
यावेळी बोलताना संतोष कदम यांनी सांगितले की, समाजातील अडचणीत सापडलेल्या कुटुंबांना मदत करणे ही आपली सामूहिक जबाबदारी आहे. लहान वयातच सेवाभाव निर्माण व्हावा, या उद्देशाने विद्यार्थ्यांच्या हस्ते मदत देण्यात आली.
दरम्यान, लहूनाना शेलार आणि सचिन बांदल यांनीही गुरव कुटुंबाला आर्थिक मदत केली.
या प्रसंगी हनुमंत भिलारे, लखन मांढरे, सुभाष खुटवड, सचिन थिटे, कृष्णा थिटे, विजय राजगुरू यांच्यासह शिक्षिका आशा गोरे, मेघा राजमाने व विद्यार्थी उपस्थित होते.
या उपक्रमामुळे आपत्तीग्रस्त कुटुंबाला आधार मिळाल्याबरोबरच विद्यार्थ्यांमध्ये सामाजिक बांधिलकीचे मूल्य दृढ झाले आहे.
