भोर व राजगड तालुक्यात विक्रमी मतदान; लोकशाही उत्सवात जनतेचा उत्स्फूर्त सहभाग
मंगेश पवार
भोर व राजगड तालुक्यात पार पडलेल्या जिल्हा परिषद व पंचायत समिती निवडणुकीत मतदारांनी विक्रमी मतदान करत लोकशाहीवरील आपला विश्वास पुन्हा एकदा अधोरेखित केला आहे. भोर तालुक्यात ७५.६२ टक्के, तर राजगड तालुक्यात ७९.३० टक्के इतके भरघोस मतदान झाले असून, या मतदानाने प्रशासनासह संपूर्ण राजकीय वर्तुळाचे लक्ष वेधून घेतले आहे.
सकाळी मतदान सुरू होताच अनेक मतदान केंद्रांवर मतदारांच्या लांबच लांब रांगा पाहायला मिळाल्या. महिला, युवक आणि ज्येष्ठ नागरिकांनी मोठ्या संख्येने मतदानाचा हक्क बजावला. ग्रामीण भागातील मतदारांनी शेतीकाम, रोजंदारी व दैनंदिन कामे बाजूला ठेवून मतदानाला प्राधान्य दिल्याचे चित्र दिसून आले.
विशेष म्हणजे महिला मतदारांचा सहभाग लक्षणीय होता. अनेक ठिकाणी महिलांनी सकाळीच मतदान केंद्रांवर हजेरी लावली. युवक वर्गामध्येही उत्साह दिसून आला असून, पहिल्यांदाच मतदान करणाऱ्या तरुण-तरुणींनी मोठ्या संख्येने सहभाग घेतला.
निवडणूक प्रक्रिया शांततेत व सुरळीत पार पडावी यासाठी प्रशासनाने कडेकोट बंदोबस्त ठेवला होता. संवेदनशील मतदान केंद्रांवर अतिरिक्त पोलीस बंदोबस्त तैनात करण्यात आला होता. पोलीस प्रशासन व निवडणूक यंत्रणेच्या सतर्कतेमुळे कोणताही अनुचित प्रकार घडला नाही.
मतदान केंद्रांवर पिण्याच्या पाण्याची व्यवस्था, सावलीसाठी तंबू, ज्येष्ठ व दिव्यांग मतदारांसाठी विशेष सोयी करण्यात आल्यामुळे मतदारांना दिलासा मिळाला. निवडणूक कर्मचाऱ्यांनी जबाबदारीने काम पार पाडत मतदान प्रक्रिया यशस्वी केली.
एकूणच भोर व राजगड तालुक्यात झालेल्या या विक्रमी मतदानामुळे लोकशाहीचा उत्सव मोठ्या उत्साहात साजरा झाल्याचे चित्र पाहायला मिळाले असून, आता मतमोजणीकडे सर्वांचे लक्ष लागले आहे.
