अखेर साताऱ्यात उदयनराजे यांना बीजेपी तर्फे उमेदवारी जाहीर.

उदयनराजे भोसले यांना उमेदवारी जाहीर, NCP शरद पवार गटाच्या शशिकांत शिंदेंशी सामना

सातारा : राज्यात सर्वाधिक चर्चेत असलेल्या सातारा लोकसभा मतदारसंघातून अखेर छत्रपती उदयनराजे भोसले यांना भारतीय जनता पक्षाच्या वतीने उमेदवारी जाहीर झाली आहे. भारतीय जनता पक्षाने आज काही उमेदवारांच्या नावांची घोषणा केली. यामध्ये महाराष्ट्रातील एका नावाचा समावेश आहे. यामध्ये छत्रपती उदयनराजे भोसले यांना सातारा लोकसभा मतदारसंघातून उमेदवारी देण्यात आली आहे. वास्तविक उमेदवारी जाहीर होण्याआधीच उदयनराजे भोसले यांनी आपल्या प्रचाराला शिरवळ सातारा हद्दीतून सुरुवात केली होती. सातारा लोकसभा मतदारसंघातून आपणच महायुतीचे उमेदवार असेल, असा दावा देखील त्यांनी केला होता. त्यामुळे अपेक्षेप्रमाणे त्यांच्या नावाची आज घोषणा करण्यात आली.

सातारा लोकसभा मतदारसंघांमध्ये आता उदयनराजे भोसले यांची थेट लढत महाविकास आघाडीचे उमेदवार शशिकांत शिंदे यांच्यासोबत होणार आहे. शशिकांत शिंदे हे शरदचंद्र पवार राष्ट्रवादी काँग्रेस पक्षाच्या तुतारी या चिन्हावर निवडणूक लढवत आहेत. या मतदारसंघातील विद्यमान खासदार देखील शरद पवार गटाचे असून त्यांनी यावेळी आरोग्याचे कारण देत निवडणुकीत उभे राहणार नसल्याचे स्पष्ट केले होते. त्यामुळे शरद पवार गटाच्या वतीने शशिकांत शिंदे यांना उमेदवारी जाहीर करण्यात आली आहे.