भोरमध्ये फोटोग्राफर संघटनेचे अभिनव आंदोलन! खराब फोटोंचा हार घालून एमएसईबी अधिकाऱ्यांना दिला इशारा!
भोर :- तालुका फोटोग्राफर संघटनेच्या वतीने आज भोर शहरात वीज खंडित होण्याच्या तीव्र समस्येवर अभिनव आंदोलन करण्यात आले. सतत लाईट ट्रिप होणे, तासन्तास शटडाऊन ठेवणे आणि त्यामुळे फोटोग्राफी व्यवसायात होणारे नुकसान याबाबत संताप व्यक्त करत संघटनेच्या पदाधिकाऱ्यांनी एमएसईबीचे अधिकारी श्री. वाघमारे यांना खराब झालेल्या फोटोंचा हार घालून आंदोलन केले.
फोटोग्राफर व्यवसाय पूर्णपणे वीजेवर अवलंबून असल्याने प्रिंट खराब होणे, संगणक व प्रिंटर बिघडणे या समस्या वारंवार निर्माण होत असून व्यापारी व नागरिकांसह फोटोग्राफर वर्ग त्रस्त झाला आहे.
संघटनेच्या पदाधिकाऱ्यांनी अधिकाऱ्यांना भेटून आपल्या समस्या मांडल्या. यावर एमएसईबी अधिकारी वाघमारे यांनी सर्व समस्या गांभीर्याने ऐकून घेत लवकरच तोडगा काढण्याचे आश्वासन दिले.
यावेळी संघटनेचे सारंग शेटे, प्रशांत कांटे, असलम आतार, तोसिफ आतार, अनिस आतार, श्रीशान भालेराव, संतोष चऱ्हाटे उपस्थित होते.
